Konseho Insular a keda informá di kantidat di notisia prekupante ku ta yega na e isla, spesialmente via blog personal, medionan sosial i tambe via e úniko korant lokal. Hopi di e publikashonnan aki ta parse di ta basá riba informashon ku ta bini direktamente for di organisashon di Gobièrnu di Boneiru, òf for di sírkulonan den i rònt di Gobièrnu.

No ta promé biaha ku siudadanonan di Boneiru ta konfrontá ku reportahenan ku despues ta resultá di ta falsu, inkompletu òf no-konfiabel. Boneiru no tin media públiko manera na Hulanda Europeo, esaki ta nifiká ku tur kompania di media establesí na e isla ta komersial. Hopi di e reportahenan resientemente publiká ta duna indikashon di ta dirigí pa interesnan polítiko i/òf komersial.

E klima di media aki ta un peliger pa demokrasia, ta perhudiká e votadónan, ta un menasa pa bon gobernashon di e isla i ta forma un atake riba e konfiansa den Gobièrnu; sea esaki ta Konseho Insular, Kolegio Ehekutivo, Gezaghèber, òf funshonarionan prinsipal konektá ku e Gobièrnu manera Sekretario di e Isla di Boneiru òf Griffier di Konseho Insular.

Griffier interino, Señor Arjen de Wolff a tuma akshon i a hasi un denunsia personalmente na Ministerio Públiko kontra di algun indivíduonan spesífiko.

Despues di a konsultá ku Gezaghèber, Konseho Insular huntu ku Gezaghèber a disidí ku ta laga hasi un investigashon formal tokante e asuntu, posiblemente ku asistensia di Rishèrshi di Reino. Esaki ta nesesario pa konservá nos demokrasia, konfiansa den gobernashon, aparato di funshonario, bon gobernashon I tambe pa pèrkurá pa un Boneiru ku votadónan bon informá i krítiko, ku ta kondená sierto práktikanan manera ariba menshoná i ta eksigí fin definitivo na nan.